Maðurinn með ljáinn: 5. hluti - Nancy kemur í heimsókn

Í síðasta hluta þessarar sögu 'gisti' maðurinn með ljáinn fyrstu nótt sína á Eye heimilinu (hann sefur ekki). Zoey er ósátt og hefur mótað áætlun til þess að myrða manninn með ljáinn, en til þess að allt gangi upp verður hún að láta eins og ekkert sé…

Zach vaknaði þegar klukkan var rúmlega 9 um morgun. Zoey var ekki við hlið hans og Spy var heldur ekki í rúminu sínu. Ætli þær hafi farið út? Hann fór á fætur, klæddi sig og gekk fram. Þá heyrði hann að þær voru greinilega niðri, með manninum með ljáinn? Hann hlustaði aðeins, hann heyrði ekki alveg um hvað þau voru að tala en skyndilega hækkaði maðurinn með ljáinn róminn. Eru þau að rífast? Zach dreif sig niður en þá blasti við honum sjón sem kom honum á óvart. Maðurinn með ljáinn, Zoey og Eye sátu saman í sófanum, hlæjandi! Maðurinn með ljáinn hafði verið að segja brandara.

„Góðan daginn…” sagði Zach, örlítið ringlaður.

„Nei hæ elskan!” sagði Zoey hamingjusöm með Spy í kjöltunni.

„Góðan daginn Zach.” sagði maðurinn með ljáinn, formlega en samt vinalega.

„Hvað eruði að gera?” spurði Zach.

„Maðurinn með ljáinn var bara að segja okkur ógeðslega fyndinn brandara. Ég eldaði pönnukökur áðan, það er nóg til ef þú ert svangur!” sagði Zoey. Í rauninni fannst Zoey brandarinn ekkert fyndinn, þetta var ömurlegur brandari.

„Já ókei, geggjað!” Zoey hafði greinilega sætt sig við ástandið og gefið manninum með ljáinn séns. Zach var svo stolltur af henni, þetta var æðislegt!

Þá hringdi heimasíminn og Zach svaraði. „Halló? Já hæ! Já einmitt, jú, jú hann er hér. Viltu tala við hann? Já, bíddu, hérna” Zach rétti fram síman til mannins með ljáinn, „Þetta er til þín, þetta er Nancy Landgraab.”

Maðurinn með ljáinn fékk sting í magann og tók við símanum. „Halló?” Hann gekk inn í vinnustofu Zoey til að fá smá næði. Zach og Zoey urðu eftir í stofunni.

„Hvað, ertu bara hress?” spurði Zach.

„Já, veistu, ég vaknaði í morgun og ég ákvað að reyna alla vega að láta þetta ganga. Ég bað manninn með ljáinn afsökunar varðandi hegðun mína í gær og við fórum bara að spjalla, hann er bara mjög vinalegur eftir allt saman. Svo segir hann líka ótrúlega fyndna brandara”.

„Vá hvað þetta er gott að heyra Zoey. Ég veit að þetta er svolítið mikið en ég kann að meta að þú sért að taka þessu svona. Ég held að þessi sambúð verði ótrúlega góð og lærdómsrík.” Þau knúsuðust og Zach fékk sér pönnukökur. Maðurinn með ljáinn kom út úr skrifstofunni.

„Heyrðu, Nancy Landgraab vill koma í smá heimsókn, er það í lagi?”

„Auðvitað!” sagði Zach með bros á vör.

„Já, auðvitað. Það er nóg til af pönnukökum!” sagði Zoey. Zoey þolir sko ekki Nancy Landgraab.

Eftir um það bil fimmtán mínútur var Nancy komin. Hún heilsaði öllum, fékk sér pönnukökur og bað svo manninn með ljáinn um að ræða aðeins við sig. Þau fóru saman inn á vinnustofu Zoey. Á meðan fór Zoey út til þess að vinna aðeins í garðinum. Hún var garðyrkjusnillingur og eyddi löngum stundum úti að sjá um plönturnar sínar. En það sem enginn vissi var að í þetta skipti var hún ekki að hugsa um plönturnar.

Maðurinn með ljáinn og Nancy ræddu saman inni á vinnustofunni.

„Ég saknaði þín.” sagði maðurinn með ljáinn, vongóður.

„Sömuleiðis.” sagði Nancy. Hún var leið á svip.

Það var þögn í smá stund. Maðurinn með ljáinn vissi ekki alveg hvað hann ætti að segja, hann vissi ekki hvernig Nancy leið eða hvað hana langaði að gera.

„Ég talaði lengi við Geoffrey… við… við ákváðum að vinna í hjónabandinu okkar…”

Nancy hélt áfram en maðurinn með ljáinn meðtók lítið. Hjartað hans var gjörsamlega mölbrotið. Hann var svo ástfanginn af Nancy, honum langaði bara að vera með henni. Burt með þennan ömurlega Geoffrey. Æji hann skildi hana og þau svo sem alveg. Geoffrey var alveg fínn gaur. En hvað með það, maðurinn með ljáinn vissi að það væri eitthvað á milli sín og Nancy, hann gat ekki bara kastað því á glæ! Hann sagði það við Nancy.

„Nancy, það er eitthvað á milli okkar og þú veist það! Við getum ekki bara kastað því á glæ!” Hann sá strax eftir því að hafa sagt þetta, hann vildi virða mörk Nancy. „Fyrirgefðu Nancy. Ég skil þig. Þetta er bara erfitt fyrir mig. En þú verður að gera það sem þú vilt gera.” Nancy kinkaði kolli.

„Þetta er líka erfitt fyrir mig. Mér þykir þetta ótrúlega leiðinlegt. Fyrirgefðu maðurinn með ljáinn.” Hún vildi ekki fara að gráta. Hún kyssti manninn með ljáinn á kinnina. „Bless, að eilífu.” Nancy yfirgaf heimilið og þar með manninn með ljáinn. Nú var hann aleinn eftir. Hann lagðist á gólfið og brotnaði niður.

Hvað gerist næst? Jafnar maðurinn með ljáinn sig á ástarsorginni? Hver er áætlun Zoey og mun henni takast að myrða manninn með ljáinn? Mun Zach gera eitthvað? Öllu þessu verður gert ljóst í næsta hluta Mannsins með ljáinn!